Беспрацоўе для нашага рэгіёну сапраўдная і вялікая праблема. Што ж казаць пра яшчэ меньшы суседні Дубровенскі раён дзе з работай яшчэ горш. Газета "СБ-Беларусь Сегодня" распавяла пра выпадак калі звальненне з працы стала прычынай нэрвовага зрыву з наступствамі, якія маглі скончыцца трагічна. 53-гадовы жыхар Дуброўна (той узрост у якім у любым раёне знайсці працу цяжка) быў звольнены з працы нечакана для сябе. Вярнуўся ён дамоў у вельмі цяжкім маральным стане, пад уздзеяннем алкаголю, а тут яшчэ і жонка не надта паспачувала бядзе.
Каб выплеснуць свае эмоцыі, ды яшчэ і пакараць жонку за безэмацыйнасць, мужчына залез у гараж, які знаходзіўся пад домам, схапіў невядома адкуль узяўшуюся гранату і пачаў пагражаць, што ўсё ўзарве. Жонка спужалася сямейнага тэрарыста і палічыла за лепшае выклікаць міліцыю. Міліцыянты не сталі штурмаваць гараж, пачалі ўгаворваць мужыка з гранатай. Для перамоваў быў выкліканы дзяржурны па РАУС — начальнік мясцовай ДАІ Аляксандар Мякінікаў. Начальнік падабраў выдатны аргумент для ўгавораў свежага безпрацоўнага — паабяццаў таго ўзяць на службу ў аўтаінспекцыю. І, надзіва, безпрацоўны ўладальнік гарнаты паверыў у такое абяцанне. Ён пагадзіўся выкінуць гранату.
Беспрацоўны і патэнцыйны працадаўца скіраваліся агародамі на бераг Дняпра, дзе мужчына і выкінуў выбухоўку на сярэдзіну ракі. Цяпер яе пошукам займаюцца вадалазы. А мужчына, сапраўды, патрапіў у міліцыю, але не як супрацоўнік ДАІ, а як абвінавачаны за пагрозу прымянення гвалту да супрацоўнікаў органаў унутраных спраў, якія знаходзяцца пры выкананні абавязкаў.
