Сітуацыя з адкрыццём капсулы, закладзенай у 1969 годзе ў сцяне Аршанскага райвыканкама выклікала пэўны скандал у Беларусі. Па-першае, адкрылі капсулу не 1-га студзеня, як запавялі продкі, а толькі 8-га. Па-другое, мітынг быў скліканы ўціхую, каб прадстаўнікі незалежнай грамадскасці не ведалі і не паспелі трапіць на яго. Па-трэцяе, аршанскае чынавенства так і не вызначылася, у які год яго "адправіла" пасланне, у 2067 на тысячагоддзе першай згадкі Оршы ў "Аповесці мінулых часоў" ці ў 2069 год, бо было аб'яўлена, што капсула закладзена "на 50 гадоў". Па-чацвёртае, пасланне з 1969 года было напісана па-беларуску, прычым Беларусь тады знаходзілася ў складзе СССР, а пасланне, напісанае ў 2019-м, напісанае цалкам па-расейску, хаця Беларусь мае сваю незалежную дзяржаву ў параўнанні з часам, калі пісалася папярэдняе пасланне.

Карэспандэнт "Свабоды" пацікавіўся ў намесьніка старшыні райвыканкаму Віктара Калачова, чаму новае пасланьне напісана на расейскай мове. І атрымаў такі адказ, стандартны для любога чыноўніка лукашэнкаўскай пары:

— У нас дзьве дзяржаўныя мовы. Якія яшчэ патрэбны камэнтары?, — адказаў на пытаньне чыноўнік.

— Аднак папярэдняе пасланьне, закладзенае ў 1969 годзе, было напісана на беларускай мове.

— Адкуль мы ведалі, на якой мове яно было напісана?! У нас дзьве дзяржаўныя мовы, якія могуць пытаньні і камэнтары?

— Дык новае пасланьне напісана на дзьвюх мовах?

— Не, мы напісалі на расейскай. Я маю на ўвазе наогул. Дакумэнты пішуцца на беларускай ці на расейскай мовах.

Пра што гаворыцца ў звароце да нашчадкаў Віктар Калачоў не распавёў.

«Зварот да нашчадкаў, каб любілі радзіму. У такім ракурсе», — сказаў ён.

У аддзеле ідэалогіі Аршанскага райвыканкаму, дзе складалі пасланьне нашчадкам, карэспандэнту "Свабоды" нічога не патлумачылі.