Пачатак 18 стагоддзя для ўсёй Беларусі звязаны з 21-гадовай Паўночнай вайной (1700-1721). Геаграфічнае становішча Оршы чарговы раз прыцягнула ў горад войскі. У 1706 і 1708 гадах з Рускімі войскамі ў Оршы знаходзіўся Пётар І.
Напачатку расейскі цар імкнуўся не рабіць вялікай шкоды мясцовай шляхце, каб атрымаць яе прыхільнасць, нават, ахвяраваў грошы на манастыр Бернардынцаў. Але ў 1708 годзе шведскі кароль Карл ХІІ, знаходзячыся пад Шкловам падаслаў правакатара ў Оршу, які распусціў чуткі, што шведскае войска пойдзе на Оршу. Тады Пётар І, каб не даць шведам перавагі пасля захопу нашага гораду спаліў значную частку дамоў і знішчыў замкавыя ўмацаванні. Пасля таго, Аршанскі замак так і не аднавіўся, а горад яшчэ доўга не мог ачуняць пасля разбурэння. Разрабаваныя былі і іншыя населеныя пункты рэгіёну.
Паралельна з вайной былі і іншыя няшчасці. Так, на Аршаншчыне разгарэлася амаль паўнавартасная вайна паміж магнацкімі групоўкамі Агінскіх і Сапегаў, а ў 1701 годзе ў Дуброўна адбыліся значныя сялянскія хваляванні.
Хаця жыццё з-за вайны не спынілася. І пэўнае развіццё горад меў. Напачатку стагоддзя будуецца касцёл ордэна марыявітак на месцы сёняшняга радзільнага дома, а ў 1714 г. засноўваецца кляштар Трынітарыяў (сёння будынак ЗАГСу).
Пасля вайны гаспадарка так і не змагла аднавіць даваенны ўзровень да самага канца існавання Рэчы Паспалітай, таму і значных, лёсавызначальных падзеяў у гэты час у гісторыі Аршаншчыны не адбывалася.
У 1724 годзе ў езуіцкім калегіюме пачынае выкладацца філасофія. Прыблізна ў гэты ж час, Езуіты засноўваюць місію ў вёсцы Пагост і рэзідэнцыю ў Фашчаўцы.
У 1758 годзе будуюцца мураваныя касцёл і манастыр жаночага базылянскага кляштара.
Орша адзін з першых гарадоў, якія патрапілі ў склад Расеі ў выніку падзелу Рэчы Паспалітай 1772 года.
У 1776 годзе горад пазбаўляецца і магдэбурскага права, якое не існавала ў Расійскай імперыі. Оршай пачаў кіраваць гараднічы, гарадское самакіраванне стала падначалена адміністрацыі, у тым ліку, губернатару. Як знак зменаў, расійская адміністрацыя ўводзіць і новы герб. Замест крыжа і месяца ўведзены герб з пяці скрыжаваных стрэлаў і паловай двухгаловага арла.
Найбольш значнай падзеяй канца 18 стагоддзя стала адкрыццё ў горадзе, двухкласнай “народнай вучэльні”.