Смеццевыя бакі закупляюць прадпрыемствы ЖКГ у рамках зацверджанай у Беларусі Канцэпцыі ўдасканалення і развіцця жыллёва-камунальнай гаспадаркі да 2025 года і бясплатна раздаюць іх уладальнікам прыватных дамоў. Першымі ў вобласці гэта зрабілі ў Оршы, дзе з пачатку года кантэйнеры атрымалі ўжо 3000 домаўладальнікаў, з ліпеня распачата работа ў Полацку. Цяпер у Віцебску абвясцілі тэндэр на закупку бакаў.
— Раней домаўладальнікі зносілі смецце ў мяхах на кантэйнерную пляцоўку і звальвалі усё ў кучу. Цяпер у кожнага гаспадара будзе па два кантэйнеры — адзін для змяшаных адходаў, другі для другасных матэрыяльных рэсурсаў, г.зн. якія можна перапрацаваць, — распавяла ў каментары "Вітвесці" начальнік камунальнага аддзела галоўнага ўпраўлення жыллёва-камунальнай гаспадаркі аблвыканкама Святлана Ляцяга. — Аплата за вываз смецця не зменіцца, дадаецца толькі адказнасць гаспадароў за захаванасць гэтай маёмасцi.
