Аддзяленне паштовай сувязі № 9, якое знаходзіцца на вуліцы Флёрава, пераехала ў больш прасторнае памяшканне таго ж будынка, дзе знаходзілася раней. Толькі зараз уваход на пошту не з боку вуліцы, а з двара. Гэты паштовы пункт абслугоўвае каля 17 тысяч чалавек, якія пражываюць у мікрараёнах № 2, 3, 4, 5. У новым памяшканні зроблены рамонт, цалкам замененая мэбля, устаноўлена неабходнае абсталяванне, паведамляе сайт Аршанскага райвыканкама. Ёсць зараз і асобнае акно для абмену пасылкамі і бандэролямі, для супрацоўнікаў аддзялення абсталяваны пакой прыёму ежы, працоўнае месца паштара.
У бліжэйшы час у аддзяленні будзе ўкаранёна сістэма электроннай чаргі, што дазволіць больш якасна абслугоўваць кліентаў. У рамках комплекснага плана развіцця рэгіёну Аршанскі РУПС праводзіць паэтапнае абнаўленне сваіх аб'ектаў. Сёлета, напрыклад, адрамантавалі АПС № 12 па вуліцы Міру, бліжэй да новага года адкрыецца пасля істотных абнаўленняў і АПС № 2 па праспекце Тэкстыльшчыкаў.
