Якасць работ і страхоўкі ў аршанскіх працаўнікоў камунальных службаў не ўпершыню выклікае асцярогі. Жанчына правалілася ў шахту ў пад’ездзе жылога дома і атрымала траўмы.
Сёлета 20 сакавіка медык Наталля Балотнікава (на фота злева) накіроўвалася на выклік. У пад’ездзе дома адсутнічала частка падлогі — дзірку часова закрылі шчытом. Аднак шчыт быў дрэннай якасці, нетрывалы. Ён праламаўся пад нагамі медработніцы.
Наталля ўпала ў шахту інжынерных сетак, зламала палец, пашкодзіла зуб і падрапала твар.
Высветлілася, што дом пастаўлены на абслугоўванне ЖЭУ-2.
Пасля падзення Наталля доўгі час не магла выходзіць з дому, нармальна есці і паўнавартасна сябе абслугоўваць. Натуральна, яна звярнулася ў суд па кампенсацыю маральнай шкоды, запатрабаваўшы ад КУП «Аршакамгас» 10 тысяч рублёў. Суд Воршы і Аршанскага раёна прыняў яе аргументы, але знізіў суму кампенсацыі.
Камунальнікі выплацяць Балотнікавай 3,5 тысячы рублёў.
