Дачка славутага лыжніка Сяргея Далідовіча Дар’я правяла сваю першую гонку ў юніёрскім Кубку свету ў біятлоне. 19-гадовая Дар’я Далідовіч дэбютавала на этапе юніёрскага Кубку свету як «уцякачка з Беларусі», паведамляе расейскае спартовае выданне «Спорт-Экспресс».
У гонцы дзяўчат у італьянскім Валь-Рыданне беларуска выступіла «без сцягу з паметкай Belarus Refugee Team (каманда ўцекачоў з Беларусі)», заняўшы 53-е выніковае месца са 115 магчымых, адзначае газета.
Раней у Беларусі Далідовіч зазнала дыскрымінацыі, бо з’яўляецца дачкой вядомага лыжніка, удзельніка сямі Алімпійскіх гульняў Сяргея Далідовіча. Аршанец падтрымаў рух пратэсту ў 2020 годзе і быў вымушаны эміграваць. У траўні 2022 году ён падпісаў Антываенную дэкларацыю, прадстаўленую Беларускім фондам спартовай салідарнасці (BFSS) на фоне вайны ва Украіне. Цяпер жыве і працуе ў польскім Закапанэ.
У студзені 2022 году BSSF звярнуўся ў Міжнародную федэрацыю лыжнага спорту наконт забароны на выступленні Святланы Андрыюк і Дар'і Далідовіч з палітычных матываў.
Рашэнне аб забароне прыняла Беларуская федэрацыя лыжных гонак — спартоўкам забаранілі ўдзельнічаць у міжнародных спаборніцтвах на працягу году нават за свой кошт. Андрыюк і Далідовіч двойчы звярталіся ў Нацыянальны алімпійскі камітэт Беларусі наконт свайго адхілення. Абодва разы камітэт, які ачольвае старэйшы сын Лукашэнкі Віктар, праігнараваў запыты, адзначаў BSSF.
У выніку Далідовіч пераехала ў Польшчу разам са сваім бацькам. Раней яна ўдзельнічала ў рэгіянальных польскіх спаборніцтвах у біятлоне.
