Фестываль для большасці людзей запомніўся аварыяй, у якую трапіў прэзідэнцкі картэж. Аднак ёсць і іншая "адметнасць". Высокія госці, гандляры і арганізатары з'ехалі з вёскі і пакінулі пасля сябе бруд. Наўпрост у вадаём скідалася смецце, у прыватнасці, паліэтыленавыя пакеты, якія, як вядома, не разлагаюцца і з'яўляюцца шкоднымі для навакольнага асяроддзя. Цяпер плынню і вятрамі пакеты прыбіла да берагоў і з абодвух бакоў рэчка засмечана, што бачна на фотаздымках.
З уладных трыбунаў часта вымаўляюцца словы пра дбайнае стаўленне да экалогіі, але сітуацыя насамрэч выглядае зусім не так пазітыўна. Фестываль скончыўся яшчэ 5-га ліпеня, за два тыдні па ім смецце нікім не прыбранае. Відаць, яго вымушаныя будуць прыбраць мясцовыя жыхары, якім тут жыць, а прыезджыя добра павесяліліся і адправіліся па дамах.
