У Рызе на выспе Луцаўсала адбыўся ўжо 10 міжнародны фестываль цыркаў "Brīnumu pilna pasaule" ("Свет поўны цудаў"). Звычайна ён праходзіць у будынку Рыжскага цырку, аднак цяпер будынак зачынены, і таму юбілейны фестываль з насычанай конкурснай праграмай быў перанесены на выспу. Дар'я Башкова з Оршы паказвала эквілібр на шпульках. Выступ беларускі настолькі "зачапіў" журы конкурсу, што менавіта ёй аддалі Гран-пры.
Дар'я займаецца ў цыркавой студыі "Фантазёры", прадстаўніцы той жа студыі Ксенія Курчанкова і Ніка Хмялькова вяртаюцца з Рыгі атрымаўшы бронзавы медаль за паветраны нумар "Журавы".
Цікава, што студыяй кіруе маці Дар'і — Святлана Раўкоўская. Раней Дар'я Башкова перамагала на фестывалях ва Украіне, Латвіі, Літве і Расеі. Цяпер наперадзе ў таленавітай дзяўчыны міжнародны конкурс у Нямеччыне — "Europen Youth Circus".
