Гісторыя з лекамі "Трамадол" адбылася ў Горках. У 2016 годзе ў былой медсястры бальніцы ў Старых Дарогах памёр муж, у якога быў рак 4-й стадыі. Інструктаж ад анколага абвяшчаў, што пасля смерці жонка павінна здаць лекі, якімі карыстаўся муж. Аднак жанчына не зрабіла гэтага. Прэпарат "Журніста" яна выкінула, а вось "Трамадол" з псіхатропнымі рэчывамі ў складзе пакінула сабе. Яна ўзяла яго з сабой і тады, калі пераязджала з Горак, дзе жыла з мужам, у Глуск да сваіх бацькоў.

У сакавіку 2018 году яна вярнулася ў Горкі і прывезла лекі з сабой. У канцы месяца зрабіла сабе нутрацягліцава ўкол "Трамадолу". Як толькі вярнулася, пачала жыць з грамадзянскім мужам Барысам. Яму пра лекі не распавядала. У красавіку да яе прыйшлі супрацоўнікі міліцыі і сказалі, што трэба агледзець кватэру. У выніку ператрусу яшчэ знайшлі лекі "Дэксаметазон", частку якога жанчына ўжо спажыла. Усе лекі былі канфіскаваныя. Таксама выяўленыя выкарыстаныя шпрыцы і пустая ампула ў смеццевым вядры.

Міліцыя выйшла на такія падазрэнні, бо дзеці Алены знаходзіліся ў сацыяльна небяспечным становішчы з-за алкагалізму жанчыны, які затым ператварыўся ў хранічны. Маёр міліцыі рабіла звычайную чарговую праверку дома, калі раптам убачыла забароненыя лекі, якія выпісваюцца строга па рэцэпце. Ужо потым, на судовым пасяджэнні Алена віну ў злачынстве не прызнала. Казала, што не была знаёмая з правіламі выкарыстання лекавых прэпаратаў, што лекары іх ёй не растлумачылі.

Дзяржаўны абвінаваўца абверг гэтыя довады абвінавачванай. У якасці доказаў віны Алены ён прывёў паказанні дапытаных у судзе мэдыкаў УАЗ "Горацкая ЦРБ", пішуць horki.info. Яны распавялі, калі і якім чынам Алене растлумачваўся парадак абыходжання з прэпаратамі, якія змяшчаюць у сваім складзе небяспечнае псіхатропнае рэчыва трамадол, дазволеных да кантралюемага абароту. Абвінаваўца таксама прааналізаваў медыцынскія дакументы з подпісамі Алены, якія пацвярджаюць, што лекары тлумачылі ёй парадак абыходжання з такімі прэпаратамі.

Было канфіскавана не менш за 210 таблетак і не менш за 60 ампул з растворам для ін'екцый, якія змяшчаюць у сваім складзе небяспечнае псіхатропнае рэчыва трамадол. Жанчына атрымала 2 гады пазбаўлення волі ў калоніі агульнага рэжыму.