Аляксандру Івуліну далі 2 гады калоніі агульнага рэжыму. Суд Савецкага раёну Менску 19 студзеня вынес вырак у крымінальнай справе супраць вядомага журналіста і футбаліста «Крумкачоў». У сваім апошнім слове Івулін казаў пра жаданне надалей займацца футболам і дапамагаць маральна і матэрыяльна сваім бацькам і брату-інваліду, аднак суддзя Сяргей Шаціла даў такі тэрмін, які прасіў пракурор.
Івуліна прызналі вінаватым па артыкуле «арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх» (ч. 1 арт. 342 КК).
Праваабаронцы яшчэ пры арышце Івуліна ў чэрвені і выстаўленні яму першых абвінавачанняў заявілі, што справа сфабрыкаваная і мае яўную палітычную скіраванасць. Сваёй віны Аляксандр ні да, на ў час суду не прызнаў, заявіўшы, што толькі выконваў сваю працу, ні да чаго не заклікаючы і нікога не падбухторваючы.
