Былая палітзняволеная Наталля Хершэ нагадала, як лісты салідарнасці падтрымліваюць вязняў за кратамі і што дапамагае пры абрыве сувязі, які здараецца праз дадатковыя рэпрэсіі памагатых рэжыму ў калоніях. Пра гэта яна распавяла праваабарончаму цэнтру «Вясна», які рэжым Лукашэнкі прызнаў «экстрэмісцкім» у помсту за абарону палітвязняў і іншых ахвяр уладаў.

Наталлю Хершэ асудзілі да 2,5 гадоў калоніі агульнага рэжыму за сарваную з супрацоўніка АМАПу балаклаву. 18 студзеня яна выйшла на волю па памілаванні. Пры гэтым, Наталля так і не напісала прашэнне аб памілаванні на імя Лукашэнкі, якога лічыць дыктатарам і самазванцам, а не законным прэзідэнтам Беларусі. За кратамі аршанку са швейцарскім пашпартам утрымлівалі 517 дзён.

«Дарагія мае суайчыннікі і ўсе неабыякавыя!

Жадаю выказаць вам маю велізарную падзяку за вашу падтрымку і салідарнасць у няпросты для мяне час. Лісты для ўсіх палітычных з’яўляюцца сувязным звяном з рэальнасцю, ад якой яны былі адарваныя рэжымам, яны даюць сілы і свядомасць, што ніводны чалавек не забыты. І нават калі рэжым усімі праўдамі і няпраўдамі імкнецца перашкаджаць гэтай сувязі, я ўпэўнена, што пазітыўная энергія лістоў абавязкова дойдзе да адрасату і ўмацуе яго. Так было ў мяне, калі 10-дзённая галадоўка, з прычыны адсутнасці карэспандэнцыі, не прынесла выніку, я сказала сабе: „Ты павінна адчуваць пазітыўную энергію падтрымкі, не маючы ёй дакументальнага пацверджання ў руках!“ Гэта зрабіла мой дух яшчэ мацней. З таго моманту адсутнасць карэспандэнцыі для мяне перастала быць мерай іх уздзеяння.

Я адчувала вашу падтрымку і ведала, што за мной большасць, за мной праўда, за намі Бог.

Дзякуй усім!»