Круглы стол па праблеме несанкцыянаваных звалак прайшоў у Оршы. У Оршы існуюць некалькі грамадскіх ініцыятываў, якія займаюцца прыборкай прыгарадных лясоў і несанкцыянаваных звалак. З боку дзяржавы кантролем ды прыборкай займаюцца адразу неклалькі структураў з вялікім штатам работнікаў, але пры такой вялікай колькасці людзей, якія займаюцца змаганнем за чысціню, праблема існуе. А разавыя прыборкі, хаця і сапраўды на некалькі месяцаў, ды нават год, дапамагаюць падтрымліваць канкрэтнае месца ў чысціні, але капітальна праблему не вырашаюць. Прадугледжаныя штрафы, як паказвае практыка, таксама не з'яўляюцца эфектыўным сродкам змагання за чысціну. Што ж тады рабіць? Нікому ж не прыемна жыць у брудзе.

Першай справай удзельнікі адзначылі, што звалкі смецця адна ад адной значна адрозніваюцца. Так, за звалкі, якія фармуюцца каля гаражных кааператываў, мусяць адказваць старшыні гэтых кааператываў, а самі ўладальнікі гаражоў абавязаны ўдзельнічаць у масавых прыборках. Іначай - штраф, адпаведна, праблему такіх звалак можна вырашыць з дапамогай штрафаў. Але штрафамі праблематычна вырашыць пытанне звалак у прыватным сектары, бо ў некаторых выпадках ёсць аб'ектыўныя прычыны, з-за якіх насельніцтва не можа "здаваць" смецце толькі раз на тыдзень. І асобна варта разглядаць звалкі ў прыгарадных лясах - тут яны ўтвараюцца з-за аматараў адпачыць на прыродзе, не захоўваючы чысціню гэтай прыроды. Прычым у дадзеным выпадку змаганнем са звалкамі павінны займацца не камунальшчыкі, а лясгасы, работнікі якога і без таго моцна загружаны.

Абмеркаванне было даволі гарачае - гаварылі і пра больш жорсткія пакаранні і пра выхаванне школьнікаў. У выніку круглага стала, удзельнікі змаглі дамовіцца да таго, што праблему звалак павінны вырашаць і грамадскія актывісты (працуючы над выхаваннем насельніцтва, самі паказваючы прыклад), але сістэмную работу па ачыстцы існуючых сёння звалак павінны арганізаваць дзяржаўныя органы, для чаго напрацаваныя прапановы будуць дасланыя ў адмысловыя гарадскія службы.