Рэдакцыя Orsha.eu працягваем падводзіць вынікі мінулага года. У рэйтынг патрапляюць рэзанансныя матэрыялы нашага сайту, якія сабралі больш за ўсё праглядаў ці каментароў, уздымалі важныя тэмы. Травень быў вельмі багаты разнастайнымі падзеямі. Адным з папулярных матэрыялаў, хоць і са знакам мінус у плане інфармацыі, стала навіна пра труп на Свярдлова, 15. Мужына памёр наўпрост у двары. Папулярны расейскі музычны сайт заблакавалі праз песню аршанскага нацыянал-сацыялістычнага гурта. У раёне Кургана знікла папулярная кавярня "Шырван" з армянскай кухняй, якая раней прызнавалася аршанцамі найлепшай у горадзе.
У Барані наўпрост на газон паставілі шапік "Табакерка". Пачалася "тытунізацыя" краіны, санкцыянаваная з самага верху, дзе сябруюць з бізнесоўцам, які валодае "Табакеркамі". Аршанскі раён тым часам выйшаў у лідэры Беларусі па выміранні насельніцтва. Двое анархістаў з суседніх раёнаў пашкодзілі прыватную скульптуру Леніна пад Віцебскам. Помнік бальшавіцкаму правадыру пацярпеў ужо не першы раз.
Вельмі часта чытаўся артыкул пра затрыманне дырэктара "Чырвонага барацьбіта", а таксама пра подпісы ў ягоную падтрымку. У Курапатах знайшлі таблічку пра расстралянага аршанца. На Аршанскім Інструментальным заводзе паказалі абноўленыя цэхі. У цэнтры Оршы спрабавалі "абнесці" краму "Рублёўскі".
