Што чытачы Orsha.eu найбольш глядзелі ў студзені? Традыцыйна, як і ў папярэднія гады, мы пачынаем падводзіць вынікі году. І пачынаем, вядома, з першага месяцу.
Самым чытаным артыкулам стаў матэрыял нашага сайту пра страйк таксоўшчыкаў з кампаніі «Яндэкс.Таксі». Здарэнне ў апошні дзень студзеня нібы паказала, што год будзе няпростым. Той выступ таксоўшчыкаў аказаўся адным з першых у чарадзе маніфестацый, праўда, накіраваны ён быў не супраць нелегітымнай улады, а супраць кіраўніцтва ўласнай кампаніі.
На Лёзненшчыне мужчына вырашыў праверыць непрацуючы феерверк і атрымаў залп у сябе.
У Талачынскім, Сенненскім і іншых раёнах высветлілася, што калгасных кароў прадавалі, каб пракарміцца самім. 2020 год яшчэ больш абвастрыў праблемы сяла, жабрацкія заробкі калгаснікаў, непрымальныя ўмовы ўтрымання жывёлы ў дзяржаўнай сельскай гаспадарцы і наяўнасць абяцанняў і шырокіх планаў на розныя «пяцігодкі» замест рэальных вынікаў з боку дзяржавы.
Пад покрывам ночы хтосьці скраў дызельнае паліва з машыны. Здавалася б, даволі звычайная навіна з крымінальнага свету выклікала ажыятаж сярод нашых чытачоў. Амаль 5 тысяч чалавек на дадзены момант прачыталі яе. Прычым здарэнне адбылося ў Талачынскім раёне — у студзені 2020 году большасць найпапулярнейшых навінаў на Аршанскім рэгіянальным партале была з наваколляў Оршы і суседніх рэгіёнаў, а не з самога горада. Гэтак адбываецца надзвычай рэдка.
Капітан міліцыі Сакалоў зляцеў з працы за шумны канфлікт у начным клубе «Баба-Яга», які адбыўся яшчэ ў 2019-м. За 2020 з працы звольняць яшчэ шмат міліцыянтаў, імаверна, праз палітычныя погляды. Шмат супрацоўнікаў звольняцца самі, пабачыўшы бясчынствы калег-сілавікоў у жніўні. Зрэшты, гэта ўжо не студзеньская тэма.
Ураджэнка Балбасава пераспявала хіт з серыялу «Вядзьмар» па-беларуску. Як звычайна, патрыятычныя сілы рабілі ўсе намаганні ў 2020-м, каб на людзей уплыў татальнай гвалтоўнай русіфікацыі быў меншым. Агучванне і пераспеў вядомых фільмаў, песень на беларускую мову — таксама важны этап, спроба паказаць, што беларуская мова такая ж сучасная, як і, напрыклад, ангельская. Яна не застаецца ў школе, і ён карыстаецца ўсё больш людзей навокал, вяртаючыся да каранёў.
