Андрэй Мельнікаў адбыў 10 сутак адміністрацыйнага арышту ў ізалятары Менскага раёну на вуліцы Скарыны ў Менску.
Вядомага беларускага музыку, аднаго з заснавальнікаў бардаўскага фэсту «Аршанская бітва» затрымалі, калі ён прыйшоў па выкліку да ўчастковага. На барда склалі пратакол за распаўсюд экстрэмісцкіх матэрыялаў у сацыяльнай сетцы «Аднакласнікі».
Прыходы ў міліцыю па выкліку ці па позве нярэдка абарочваюцца арыштамі і «соднямі», як адбылося на пачатку лютага з аршанскай зооабаронцай Аленай Мірашнічэнкай.
Андрэя Мельнікава па выхадзе з содняў сустрэлі сябры. Ён падзякаваў за падтрымку і малітвы ўсім, хто думаў пра яго ў гэты час.
