Вядомы бард Андрэй Мельнікаў, сям’я, жыццё і творчасць якога ўва многім звязаныя з Воршай, затрыманы і знаходзіцца ў ізалятары. Нейкі час сваякі шукалі спадара Андрэя, бо ён знік. Увечары 28 студзеня стала вядома, што барда затрымалі сілавікі.
Па якім абвінавачанні — невядома, але неафіцыйныя крыніцы гавораць, што ў фармулёўцы лукашэнкавы сілавікі напісалі «дробнае хуліганства».
Як напісаў сын Андрэя Мельнікава Марцін, сваякам пра затрыманне нічога ў міліцыі не сказалі, больш за тое — нават прынялі заяву аб знікненні чалавека.
Выканаўца і аўтар шэрагу славутых патрыятычных беларускіх песень будзе знаходзіцца ў ІЧУ Менскага раёну да 5 лютага.
Мельнікаў у 90-я гады стаяў ля вытокаў бардаўскага фестывалю «Аршанская бітва», выпусціў шэраг музычных альбоомаў, напісаў некалькі песень пра Воршу, у якой правёў нямала часу, даў сотні выступаў на фестывалях і канцэртах як у Беларусі, так і за мяжой. З’яўляецца адным з найбольш знакамітых і запатрабаваных беларускіх бардаў сучаснасці.
