У 15.00 у музеі пройдзе прэзентацыя керамічных цацак Народнага майстра Беларусі Таццяны Шынкаровай. Яна з’яўляецца адным з нешматлікіх носьбітаў майстэрства вырабляць гліняныя свістулькі, тэхналогія стврэння якіх ўнесена ў Дзяржаўны спіс гісторыка-культурных каштоўнасцей Беларусі.
Гліняныя народныя цацкі Аршанскага Падняпроўя і Віцебскага Прыдзвіння вылучаюцца сваёй вобразнасцю - яны могуць быць у выглядзе жанчыны, кавалера і дамы, гарманіста і конніка, каня, сабакі, птушкі, качкі, ягняці. Ёсць таксама свістулькі, у якія наліваюць ваду для надання ім асаблівага гучання.
Майстэрствам надаваць гліне ўласны голас Таццяна Шынкарова валодае дасканала і перадае гэтую традыцыю наведнікам Аршанскага дома рамёстваў. Цяпер і музей “Млын” арганізуе майстар-клас для ўсіх ахвотных даведацца, у чым сакрэт цацкі, якую многія ведаюць з дзяцінства.Таксама ў музеі пройдзе міні-канцэрт дзіцячага ўзорнага ансамбля фальклорнай музыкі “Шчодрыкі”.
