На выходных у Оршы магілёўскія грамадскія актывісты з Цэнтра гарадскіх ініцыятываў наведалі Оршу, каб распавесці свой пазітыўны досвед работы. Адразу варта адзначыць, што на мерапрыемства сабраліся вельмі разнастайныя людзі: ад тых хто раней увогуле не займаўся грамадскай дзейнасцю да актывістаў ужо вядомых арганізацый. Ад дзяржаўнай БРСМ да дэмакратычнага "Звяз".

Напачатку магілеўчане распавялі пра сябе і свой досвед работы. Цэнтар гарадскіх ініцыятываў працуе ў Магілёве ўжо 7 гадоў. За гэты час актывісты аб'яднаныя ў Цэнтры змаглі правесці некалькі соцень мерапрыемстваў шэраг з якіх стаў вельмі яскравымі і доўгаграючымі праэктамі. Самае вядомае з іх - дранік-фэст. Штогадовы кулінарны фестываль, дзякуючы якому Магілёў упершыню быў заўважаны тэлеканалам Еўран'юс, а цяпер штогод збірае па 10.000 чалавек і з'яўляецца адным з найбольш цікавых фестываляў краіны. Другое рэгулярнае мерапрыемства: агульнагарадскі пікнік - арыгінальня форма камунікацыі людзей дзе кожны ахвотны можа прадставіць свой занятак, або проста пасядзець на траве ў кампаніі і паглядзець на прадстаўленні. Апошнім часам ЦГІ запусціў асобны праэкт "Цяпліца", які знаходзіць новых актывістаў і дапамагае ім рэалізаваць свае ідэі ў гарадской прасторы.

Такое знаёмства з паспяхова рэалізаванымі кампаніямі дало натхненне і аршанцам у выніку тут жа "на каленцы" былі накіданыя ідэі па паляпшэнні нашага горада. Ідэі атрымаліся вельмі стракатымі, пачынаючы ад правядзення ў Оршы карнавалу ці першага чэмпіянату свету па гульні ў "Квадрат", скончваючы стварэннем танцпляцоўкі для сталых людзей і стварэннем зоо-прытулка каля горада. Не абыйшлося і без абмеркавання бягучых праблемаў: парк на Ільнокамбінаце, які прапаноўвалася не проста добраўпарадкаваць, а зрабіць культурна-забаўляльную прастору на абодвух берагах і запусціць паміж імі паром. Абмяркоўвалася і праблема продажу аршанцам крэазотных шпалаў ,якія пры выкарыстанні ў побыце выклікаюць рак, а ў Оршы з іх будуюць лазні, сараі, дамы і проста топяць печкі.

Асноўнае, што змаглі вынесці для сябе ўдзельнікі аршанскай "Цяпліцы", што нічога немагчымага ў гэтым свеце няма і ў прынцыпе грамадства пры правільным падыходзе можа лепш за чыноўнікаў рабіць горад больш камфортным. Сапраўды, калі хаця б частка з агучаных на мерапрыемстве ідэяў будуць рэалізаваныя ў Оршы, то горад стане нашмат больш яркім, цікавым ды камфортным.