Схема па якой абакралі віцебскую пенсіянерку вядомая даўно, але ж старыя людзі працягваюць патрапляць на гэтую простую злачынную методыку. Пры такой схеме галоўнае для вароў — патрапіць у кватэру ахвяры, далей усё робіцца хутка і на аўтамаце.

Дык вось, 3 чэрвеня днём у кватэру да віцебскай 87-гадовай пенсіянеркі пагрукаліся дзве жанчыны. Яны прапаноўвалі купіць мала каму патрэбныя пледы. Пры гэтым даверлівая пенсіянерка хаця і не збіралася нічога купляць, запусціла варовак у кватэру. Далей адна з іх загаворвала зубы бабулі, а другая ў гэты самы час шарылася па паліцах хаты. Такім чынам жанчыны скралі залаты цэп. Але на гэтым не ўсё — адчуваючы бяспеку — што ім машла зрабіць слабая старушка — жанчыны проста з ахвяры сарвалі залатыя завушніцы. Ад такой нахабнасці перапужаная жанчына не адразу набралася сілаў звярнуцца ў міліцыю. Калі міліцыянты прыехалі на месца здарэння, то бабуля яшчэ і не магла апісаць знешнасць злачынцаў — у яе кепскі зрок.

А ў гэты час вароўкі з нарабаваным, перакананыя ў сваёй безпакаранасці, рушылі дамоў у Бабруйск. Але даехалі яны толькі да Оршы дзе і былі затрыманыя. Жанчыны гэтыя раней ужо судзімыя за падобныя злачынствы і таму міліцыя падазрае, што інцыдэнт у Віцебску быў не адзіным. Калі вы таксама пацярпелі ад дзеянняў гэтых жанчынаў, то паведамце пра гэта ў міліцыю.