У Суд Цэнтральнага раёну Менска паступіла крымінальная справа, пачатая летась супраць былога галоўнага трэнера “Смаргоні” Мікалая Рындзюка. Перад матчам з “Оршай” у мінулым годзе Рындзюк даў хабар у 100 еўра начальніку Дэпартамента судзейства Беларускай федэрацыі футбола Андрэю Жукаву за тое, каб ён прызначыў на матч “Смаргонь” – “Орша” “правільнага” суддзю. Гэтым арбітрам аказаўся добра знаёмы Рындзюку Андрэй Сарока. Па словах самога Рындзюка, яго каманду засудзілі ў пары папярэдніх гульняў,а пры Сароку ягоныя падапечныя “адчувалі сябе ўпэўнена”. “Смаргонь” выйграла ў “Оршы” 3:0, і нават аршанцы прызналі справядлівасць перамогі суперніка, але ў галоўнага трэнера “сіня-белых” Юрыя Канаплёва па некаторых момантах узніклі пытанні да арбітражу, ачольнік “Оршы” палічыў, што арбітр быў несправядлівым і дапамагаў смаргонцам.
Андрэй Жукаў ужо быў асуджаны да 5 гадоў зняволення, арбітр Андрэй Сарока пазбегнуў пакарання, хаця неўзабаве пасля таго матчу ён на некалькі дзён быў змешчаны пад варту. Цяпер перад судом прадстане Мікалай Рындзюк. Судзіць колішняга футбаліста зборнай Беларусі і трэнера “Смаргоні” будуць па частцы 1 артыкулу 431 Крымінальнага кодэксу Рэспублікі Беларусь. Яму пагражае да 5 гадоў пазбаўлення волі.
