Каля 15-00 дубровенскі актывіст Аб'яднанай грамадзянскай партыі Міхаіл Чамурака выйшаў з дому ў краму. Але вярнуўся дамоў у суправаджэнні міліцыі і двух панятых. Як заявілі міліцыянты, Міхаіл падазраецца ў тым, што вешаў бела-чырвона-белыя стужкі ў Дуброўна. Праўда, агляд памяшкання мала што даў - уся кампутаровая тэхніка, якая цікавіла міліцыянтаў была канфіскаваная пры мінулых вобшуках. У выніку міліцыянты забралі паветраныя шарыкі белых і чырвоных колераў, якія перад Новым годам павесіў сын Міхаіла.
Як аказалася, адначасова з вобшукам дома (афіцыйна дом належыць жонцы Міхаіла і ён там, нават, не прапісаны) такі ж агляд памяшкання распачаўся дома ў маці Міхаіла і яго сястры, якія таксама жывуць у Дуброўна. Падобна, што акрамя як праводзіць вобшукі ў дубровенскай міліцыі іншай работы няма...
Жонка Міхаіла (якую таксама выклікаюць у міліцыю, але ў суботу) патлумачыла нам, што гэтае затрыманне можа быць проста помстай мясцовых міліцыянтаў Міхаілу. Яго затрымлівалі ўжо двойчы па розных адміністрацыйных абвінавачаннях, але абодва разы суд Аршанскага раёна выносіў апраўдальныя пастановы - падцверджваў, што затрыманні былі не матываваныя, а Міхаіл нічога не парушаў. Так, відавочна, атрымліваецца і ў гэты раз. Міхаіла затрымалі ў пятніцу і да панядзелка (калі суд зноў будзе работаць у поўнай меры) ён прабудзе ў ІЧУ. Нават калі суд палічыць яго ні ў чым не вінаватым, Міхаіл адседзець амаль трое сутак.
