Раней мы пісалі пра чарговае затрыманне Міхаіла Чамурака ў панядзелак. Той артыкул атрымаўся не дакладны, але цяпер Міхаіл зноў на волі і змог сам усё распавесці з першых вуснаў.

Сапраўды, у панядзелак Міхаіла затрымала дубровенская міліцыя, абвінаваціўшы ў тым, што быццам бы ён развешваў бел-чырвона-белыя стужкі на дубровенскім мосце.

У аўторак Чамураку накіравалі ў суд, які не адбыўся — суддзя адправіў справу на дапрацоўку. Атрымалася, што без рашэння суда Міхаіл дзве ночы правёў за кратамі. А ў сераду распачаўся суд паўнавартасны. Міліцыянты не змаглі прад’явіць стужачкі, якія быццам бы нехта развешваў. Адзіная сведка не з ліку міліцыянтаў таксама не змагла распавесці каго яна бачыла на тым мосце і чым чалавек займаўся.

Гэта ўжо трэці раз калі Міхаіла затрымліваюць, ён праводзіць некалькі сутак (такім чынам да суда можна трымаць чалавека 72 гадзіны) праводзіць у зняволенні, а ў судзе яго віну даказаць не могуць.

Зразумела, што гэта проста дадатковы ціск на палітычнага актывіста. Тым больш, што паралельна ідзе ціск і на яго сям’ю. Так, заўтра а 10-00 распачнецца суд над жонкай Міхаіла, Людзьмілай. Яе вінавацяць у хуліганстве, бо яна зайшла ў будынак дубровенскай пракуратуры (у папярэднім артыкуле мы пісалі пра Аршанскую пракуратуру. Выбачаемся за памылку), бо туды выклікалі Міхаіла, які ў гэты час быў у зняволенні і паднялася на другі паверх. Па меркаванні аднаго з пракурорскіх работнікаў, такім чынам яна зашкодзіла працы ўсёй установы.

А 14-00 да Чамуракаў дамоў прыйдзе камісія па СОП, якая будзе высвятляць ці ў нармальным стане выхоўваецца іх дзіцёнак, што таксама звязана з частымі «пасадкамі» Міхаіла.

Але, бачна, дубровенскім міліцыянтам зусім-зусім сумна. Бо па нашай інфармацыі сёння па нейкай крымінальнай справе ў Дуброўна адбыўся ператрус у яшчэ аднаго актывіста Мікалая Куляшова. Больш інфармацыі пра гэтую справу мы спадзяемся атрымаць заўтра.