Аддзел ідэалагічнай і выхаваўчай работы ВНУ распрацаваў праект "Маладзёжны суботнік". На першы погляд, ён накіраваны на развіццё валанцёрскага руху. Аднак, калі чытаць матэрыялы праекта ўважліва, то нельга не заўважыць ідэалагічную ўстаноўку. Студэнтаў арганізуюць на бясплатную працу па захаванні экалогіі не з любові да прыроды, а таму, што Аляксандр Лукашэнка падпісаў указ пра абвяшчэнне 2025 года "Годам добраўпарадкавання".
"Кіраўніком праекта прызначаная педагог Юлія Ясюковіч, якая будзе сачыць за тым, як, згодна з указам, "будзе актывізавацца валанцёрскі рух і рэалізацыя грамадзянскіх ініцыятыў", - піша інтэрнэт-рэсурс MAYDAY TEAM, у распараджэнне якога трапіла копія праекта.
Паводле інфармацыі выдання, студэнты ўжо папярэджаныя аб тым, што "добраахвотныя" суботнікі будуць праходзіць кожны навучальны месяц, пачынаючы з сакавіка. Улетку будзе перапынак на вакацыі, а з верасня па снежань усё працягнецца зноў.
Акрамя гэтага, у рамках праекта прадугледжана "добраахвотная" і бясплатная праца студэнтаў на прысядзібных участках ветэранаў працы БДСГА. Назва гэтай акцыі -- "Добрыя рукі".
