Як мы паведамлялі, 19 студзеня супрацоўнікі міліцыі звярнулі ўвагу на відэаролік у пабліку "ЛЁЗНА \ ЛИОЗНО", дзе хлопчык б'е сабаку нагой і цягае яе за павадок. У каментарах жыхары прасілі звярнуць увагу на гэты выпадак, маўляў, гэта непрымальна, калі маленькае дзіця так жорстка сябе паводзіць.

Пазней было ўстаноўлена, што на відэа, запісаным, верагодна, суседзямі, – юны жыхар мікрараёна «Школьны», а сабака – хатні гадаванец. Адміністрацыйны пратакол быў складзены ў дачыненні да яго бацькоў, бо адказнасць за падобныя правапарушэнні надыходзіць з 16 гадоў.

У пачатку лютага гэты пратакол стаў прадметам разгляду на раённай камісіі па справах непоўнагадовых. На пасяджэнне былі выкліканыя і бацькі, і іх 8-гадовы сын. Дарэчы, ён -- не адзінае дзіця, сям'я шматдзетная. Хлопчык апраўдваўся: казаў, што ў яго не атрымлівалася выканаць хатняе заданне, таму ён зрываў злосць на сабаку, якую бацькі папрасілі выгуляць. Па словах бацькоў, раней за дзіцем ніколі не назіралася праяваў падобнай агрэсіі.

Члены камісіі правялі прафілактычную гутарку са школьнікам, а бацькам рэкамендавалі пракансультавацца з псіхолагам наконт дадзенага выпадку. Штрафных санкцый да дарослых прымяняць не сталі, хоць адпаведны артыкул у Адміністрацыйным кодэксе прадугледжвае пакаранне штрафам у памеры да 15 базавых велічынь.