Аршанская гарадская мастацкая галерэя імя В.Грамыкі прапануе паглядзець пастаянныя экспазіцыі, а таксама наведаць незвычайны экспазіцыйны праект «НейроБеларусь». Усе выявы, якія тут можна ўбачыць, створаны штучным інтэлектам. Ацаніць, наколькі дакладна ШІ разумее гісторыю і сучаснасць нашай краіны, можна штодня, апрача панядзелка.
Але 16 лютага наведнікаў запрашаюць на экскурсію-квэст, якія праводзяцца па гэтай экспазіцыі толькі па нядзелях. Арганізатары абяцаюць цікавыя аповеды і незвычайныя ўражанні. Кошт квэста – 10 рублёў разам з экскурсіяй ( ільготны білет для пенсіянераў, школьнікаўі студэнтаў – 7 рублёў).
Аршанскі музей Ул. Караткевіча, апрача сталай экспазіцыі, прадстаўляе выставу твораў удзельнікаў студыі майстроў -рамеснікаў Галіны Кутузавай і Андрэя Дакумава і выставу «Рамесная карусель», дзе экспануюцца творы полацкага Народнага клуба аматараў ласкутнага шытва «Рошва».
Музей драўлянай скульптуры разьбяра Сямёна Шаўрова прапануе паглядзець не толькі мастацкія працы знакамітага майстра, але і выстаўку твораў яго юных паслядоўнікаў са студыі «Адроў».
Музей гісторыі і культуры Оршы запрашае на выстаўку «Чатыры галоўныя вынаходніцтвы Кітая». А таксама, вядома, і пазнаёміцца з пастаяннай экспазіцыяй, прысвечанай Аршаншчыне.
Этнаграфічны музей «Млын» гатовы пазнаёміць наведнікаў са сталымі экспазіцыямі «Хлеб наш штодзённы» і «Святло душы і таленту». Тамсама можна ўбачыць і экспанаты з прыватнай калекцыі Людмілы Каюравай «Амто (здравствуй), Корякия!»
Дарэчы, раім сачыць за рэкламай! Гэты музей запачаткаваў шэраг унікальных для Оршы імпрэзаў – этналекторый «100 парадаў для здароўя». Запрошаныя госці будуць распавядаць, якімі народнымі сродкамі лекаваліся нашыя продкі. Наступнае пасяджэнне плануецца якраз у лютым.
