Леанід Трафімавіч Калодзежны нарадзіўся 28 лютага 1935 года ў вёсцы Солаўе (цяпер належыць да Андрэеўшчынскага сельсавета) у сялянскай сям'і.
У 1951–1953 гг. вучыўся ў Віцебскім мастацка-графічным педвучылішчы, у 1954–1955 гг. служыў у арміі. Старэйшае пакаленне аршанцаў можа памятаць Леаніда Калодзежнага як супрацоўніка аршанскай раённай газеты «Ленінскі прызыў», з 1961 г. ён працаваў мастаком-афарміцелем на Аршанскім ільнокамбінаце.
Першае апавяданне пісьменніка выйшла ў 1958 годзе ў літаратурна-мастацкім альманаху «Дзвіна». Леанід Калодзежны - аўтар зборнікаў апавяданняў «Аўсяны звон» (1975) і «Бярозы ў жыце» (1981). Некалькі ягоных аповесцяў выходзілі ў беларускім перыядычным друку.
Памёр Леанід Трафімавіч 26 снежня 2003 года.
У памяць пра пісьменніка на ягонай малой радзіме пройдуць бібліятэчныя мерапрыемствы.
У Андрэеўшчынскай сельскай бібліятэцы 28 лютага ў 15.00 адбудзецца літаратурна-музычны вечар «Салаўянскія замалёўкі».
У Вусці бібліятэкары падрыхтавалі імпрэзу для чытачоў пад назвай «Вясёлыя замалёўкі», яна пройдзе 28 лютага ў 17.00.
