Дакладней, у спаборніцтвах па колькасці малака бралі ўдел непасрэдна каровы, а ва ўсім астатнім - работнікі чатырох ферм КСУП «саўгас імя Машэрава».
Згодна з умовамі конкурсу “Карміцелька-2025", які тут правялі ўпершыню, ад кожнай фермы былі дэлегаваныя каровы, што даюць не менш за 25 л малака сутачнага надою. Гэта ўсё, што патрабавалася ад канкурсантак. Астатняе рабілі людзі: каб " карміцелькі "годна выглядалі на конкурсе экстэр'ера, кароў прыбіралі ў вянкі са штучных кветак, накрывалі каляровымі гунькамі, упрыгожвалі стойлы рознакаляровымі стужачкамі і нават матывацыйнымі плакатамі.
Для загадчыкаў і брыгадзіраў ферм быў арганізаваны конкурс прэзентацый кароў - удзельніц спаборніцтваў. У гонар іх былі напісаны вершы, гучалі песні, прыпеўкі, часам у выкананні цэлых жывёлагадоўчых ансамбляў!
Сумесныя намаганні кароў і работнікаў ферм ацэньвалі дырэктар сельгаспрадпрыемства Уладзімір Сафронаў і спецыялісты саўгаса - заатэхнікі і ветурачы. Ніводная з "каманд " не была абдзелена станоўчым рашэннем: чатыры фермы занялі тры прызавыя месцы плюс прыз глядацкіх сімпатый.
"Ад кіраўніцтва сельгаспрадпрыемства прадстаўнікам ферм былі ўручаны дыпломы і каштоўныя падарункі", -- піша раённая газета" Сенненскі край". Вось толькі чым парадавалі ўласна кароў-канкурсантак, якія чэсна адпакутвалі ў "модных аксэсуарах", не паведамляецца.
