Выстава дэкаратыўна-прыкладнога мастацтва працуе тут з 6 сакавіка. І гэты музей - адзіная ўстанова аршанскай музейнай сістэмы, дзе падрыхтавалі нешта адмысловае да традыцыйнага жаночага свята.
Усе афіцыйныя ўрачыстыя мерапрыемствы да 8 сакавіка ва ўстановах культуры прайшлі напярэдадні - у апошні дзень працоўнага тыдня. Напэўна, гэтым арганізатары хацелі падкрэсліць, што ахвотным адсвяткаваць найлепей зрабіць гэта ў сямейным коле або ў рамантычнай абстаноўцы.
А тыя, хто 8 сакавіка не адзначае, могуць у гэты дзень наведаць пастаянныя выставы Музея гісторыі і культуры горада Оршы, этнаграфічнага музея “Млын”, аршанскага музея Уладзіміра Караткевіча і ваенна-гістарычнага музея імя К.С.Заслонава. Аматараў выяўленчага мастацтва запрашае завітаць аршанская мастацкая галерэя Віктара Грамыкі.
Адмыслова да “жаночага дня” падрыхтаваўся Дом культуры пасёлка Балбасава. Тут будуць працаваць фотозона «Женская атмосфера» і выстава дзіцячых малюнкаў «Весеннее солнце, как мама».
Аршанскі гарадскі цэнтр культуры “Победа” 9 сакавіка запрашае на танцавальную праграму ў фармаце Open air. У дзіцячым парку “Сказочная страна” ў 17.00 пачнецца вечар адпачынку “Тем, кому за...”
