Факты выпальвання мінулагодняй травы і сухога хмызняку зафіксаваны ў вёсках Вялікія Калінавічы і Малыя Міснікі Лёзненскага раёна. МНС папярэджвае: за выпальванне сухой расліннасці прадугледжаны шраф памерам ад 10 да 30 базавых велічынь ( ад 420 да 1260 рублёў) паводле арт. 16.40 КаАП.
Існуе меркаванне, што прысак ад спаленай травы добра ўгнойвае глебу. Але навукоўцы даўно даказалі, што гэта не так. Больш за тое: выпальванне травы шкодзіць захаванню экасістэмы, бо знішчае карэнне расліннасці. І што асабліва страшна — нясе пагрозу людскім жыццям: вядомыя выпадкі, калі людзі, асабліва сталыя і нямоглыя, не могуць выбрацца з агню, які хутка ахоплівае вялікія тэрыторыі.
Штрафы ў адпаведнасці з арт. 16.21 КаАП прадугледжаны таксама за парушэнні патрабаванняў па забеспячэнні пажарнай бяспекі ў лясах. З наступленнем цёплага надвор’я людзі пачынаюць выязжаць «на прыроду», і бывае, што пакідаюць недапаленыя вогнішчы або знарок выпальваюць сухую траву і расліннасць у лясной зоне. Каб пазбегнуць гэтага, Талачынскі лясгас афіцыйна папярэджвае пра наступленне пажаранебяспечнага сезону і праверкі ў лясных масівах. За парушэння патрабаванняў супрацьпажарнай бяспекі вінаватым пагражае штраф памерам 12 базавых велічынь (504 рублі) , а калі гэта пацягнула за сабой пашкоджанне лесу або тарфянікаў — да 30 базавых велічынь (1260 рублёў).
З пачатку сакавіка службы МНС Віцебскай вобласці зарэгістравалі некалькі пажараў, прычынай якіх стала выпальванне сухой расліннасці, у тым ліку ў Аршанскім раёне. На іх 1 чалавек загінуў і 5 былі траўмаваныя, агнём знішчана больш за 50 пабудоваў.
