Наведнікі ўбачаць творы майстроў суседняга рэгіёна з Дому рамёстваў. У гэтай установе ўжо больш за 30 гадоў зберагаюць народныя умельствы і навучаюць ім усё новыя пакаленні моладзі і дарослых.

На выставе ў Оршы можна будзе ўбачыць арыгінальныя вырабы з дрэва, тканіны, саломы і вядома ж, з гліны. Менавіта сваёй керамікай заўсёды славілася Дубровеншчына. У Дуброўне нават была вуліца Ганчарная, на якой даўней жыла знакамітая Ганна Марачова, імя якой згадваецца ў энцыклапедыі народнага мастацтва Беларусі. Яна рабіла гліняныя цацкі-свістулькі, якія зараз захоўваюцца шмат у якіх этнаграфічных музеях. Уласная калекцыя “марачоўскіх” свістулек ёсць і ў дубровенскім Доме рамёстваў.

У 2020 годзе глінянай свістульцы быў нададзены статус нематэрыяльнай гісторыка-культурнай каштоўнасці, а традыцыі вырабу гэтай цацкі-забаўкі на мясцовы, дубровенскі лад, захавалі да сённяшняга дня Вольга Аляксеева і Людміла Чарвінская. Зрэшты, працуюць над захаваннем творчай спадчыны рэгіёну не толькі яны: у дубровенскім Доме рамёстваў існуе цэлы клуб майстроў пад назвай “Дубрaва”.

Іх вырабы будуць прадстаўлены на выставе ў аршанскім этнаграфічным музеі “Млын”, але ахвотным убачыць гэтыя экспанаты варта паспяшацца. Экспазіцыя будзе працаваць усяго два тыдні - з 14 сакавіка да 4 красавіка.