Віцебскі “Вітэн”, які зноў узяў за правіла гуляць у Оршы, якая так доўга была родным для клуба горадам, уступае ў медальныя разборкі ў чэмпіянаце Беларусі па міні-футболе. У супернікі “чырвона-чорным” дастаўся гомельскі ВРЗ (вагона-рэмонтны завод). У гэтым сезоне “Вітэн” двойчы саступіў ВРЗ 1:5 і 2:3, таму гульня не будзе простай. Адметна, што рэгламент дазваляе клубам у Беларусі гуляць з чатырма замежнымі гульцамі, а такіх у складзе “Вітэна” цэлых пяць, і ўсе з Украіны. Але адзін з гульцоў Сяргей Крыкун ужо атрымаў від на жыхарства ў Беларусі, а таму легіянерам не лічыцца.
Серыя доўжыцца да 2-х перамог адной з каманд. Першы матч “Вітэн” – ВРЗ адбудзецца ў Оршы ў спартовым комплексе “Алімпіец” побач з Лядовай арэнай 5 траўня. Пачатак матчу а 19:00.
Другая сустрэча пройдзе ў Гомелі 9-га траўня.
