Нараджэнец Круглага Магілёўскай вобласці Іван Яравы пасля пачатку вайны ва Украіне адправіўся на ўсход суседняй краіны, дзе прымаў удзел у баявых дзеяннях на баку непрызнанай у свеце самаабвешчанай "ЛНР". Нягледзячы на тое, што ў Беларусі ёсць крымінальная адказнасць за наёмніцтва, Яравы спакойна вярнуўся з вайны ў Беларусь. Яго затрымалі ў Оршы і некалькі дзён патрымалі ў камеры, дзе "Пушкін", па ўласным прызнанні, карыстаўся павагай міліцыянтаў, якія былі на баку прарасейскіх экстрэмістаў, гуляў у кампутарныя гульні. Затым "Пушкіна" і наогул адпусцілі дамоў. Супраць тэрытарыяльнай цэласці Украіны Яравы ваяваў у складзе "Казачьего полка ЯрГА". Пасля таго, як баевіка адпусцілі, ён зноў адправіўся ва Украіну на вайну забіваць украінскіх вайскоўцаў і тэрарызаваць мірных грамадзян.
Міліцыя правяла некалькі вобшукаў у Круглым, куды Яравы зноў вярнуўся з вайны ў жніўні 2016 года, але яны не скончыліся нічым. Чаму ж закон не дзейнічае, і тэрарыст вольна разгульвае па вуліцах Беларусі, у праваахоўных органах дагэтуль не патлумачылі.
Адзначым, што Яравы спакойна кантактаваў з беларускімі незалежнымі медыямі, у якіх бравурна заявіў, што калі б у Беларусі пачаўся "свой Майдан", ён пайшоў бы яго са зброяй разганяць. Акрамя таго, "Пушкін" сказаў, што выступае супраць людзей, якія размаўляюць па-беларуску, і гэта пры тым, што сам Яравы - этнічны беларус.
Але ў траўні Яравым зноў нечакана зацікавіліся беларускія праваахоўнікі. Яго без усялякіх позваў забралі з дома а 6:00 і завезлі ў суд. Верагодна, тэрарыст "насвяткаваўся" 9-га траўня з алкаголем. Пасяджэнне доўжылася каля 10 хвілінаў, на ім Яравому прысудзілі 1 год у лячэбна-працоўным прафілакторыі (ЛПП). ЛПП — месца, якое сярод зняволеных часам называюць "канцлагерам", гэта перажытак часоў СССР, да якога праваабаронцы маюць нямала пытанняў. Натуральна, ні ў адной цывілізаванай краіне Еўропы ніякіх ЛПП няма. Ніякага лячэння, па сведчаннях шэрагу людзей, якія пабывалі там, яны там не прайшлі. Гэта проста адна з формаў пакарання з бясплатнай працай зняволеных. Але чаму тэрарыста, які ваяваў за так званую "Луганскую народную рэспубліку", адправілі ў ЛПП, а не завялі на яго крымінальную справу - пытанне да беларускай дзяржавы.
