Ужо напоўніцу ідзе перыяд агітацыі за кандыдатаў, а кандыдатаў незаўважна: сустрэчы з выбаршчыкамі калі і праходзяць, то толькі ў працоўных калектывах і шырока не анансуюцца. Улётак за кандыдатаў не з'явілася. Радыё, па якім выступіць частка кандыдатаў, мала хто слухае, а некаторыя кандыдаты і ўвогуле адмовіліся выступаць. У "Аршанскай газеце" праграмы кандыдатаў публікавацца не будуць (калі толькі кандыдаты не заплоцяць за публікацыю, але, пры малой матывацыі да ўдзелу ў выбарах сумніўна, што нехта будзе на гэта траціць грошы). У такой, ужо традыцыйнай для Беларусі сітуацыі, можна меркаваць, што яўка выбаршчыкаў будзе невялікай, а тыя, хто ўсё ж прыйдзе на выбары, будуць галасаваць не за праграмы і вобраз кандыдата, а за фотаздымкі і за вытрымкі з біяграфіі на агульных улётках, вырабленых выбаркамамі. У такіх умовах выбаршчык становіцца не чалавекам, ад якога залежыць лёс кандыдатаў, а толькі статыстам, перад якім і кандыдаты не надта будуць адказваць.

Пры гэтым усім, у некаторых кандыдатаў ёсць цікавыя факты ў біяграфіях, што можа дапамагчы ім запомніцца выбаршчыкам.

Так, можа запомніцца выбаршчыкам акругі №3 даволі малады кандыдат Дзяніс Касякоў. Бо асноўны яго занятак — апякун за інвалідам. З такой рэдкай прафесіяй у Савет ідзе толькі адзін кандыдат.

Можа запомніцца выбаршчыкам і кандыдат Аляксандар Буеў, бо, па-першае, ён адзіны ў спісе студэнт. Прычым, студэнт-завочнік маскоўскага ўніверсітэта. Па-другое, гэта адзін з самых маладых кандыдатаў — 1996 год нараджэння. Такіх маладых кандыдатаў у Оршы толькі двое: Буеў і Таццяна Селіхановіч, якая ідзе па акрузе №2.

Яшчэ адна нечаканая прафесія сярод кандыдатаў — будаўнік могілак. Такую прафесію мае Уладзімір Танко, які вылучаны Камуністычнай партыяй па акрузе №4.

Калі мы ўжо загаварылі пра партыйных кандыдатаў, то варта адзначыць і сацыяльны склад партыйных вылучэнцаў. Так, Ліберальна-дэмакратычная партыя з пяці чалавек, якія былі зарэгістраваныя, вылучыла дваіх людзей без працы. Праўда, даўно заўважана, што ЛДП вылучае на ўсе выбары статыстаў ,якія насамрэч ні на што не прэтэндуюць.

Цікавы партыйны спіс і ў малавядомай Рэспубліканскай партыі працы і справядлівасці. Яшчэ нядаўна пра партыю гэтую ў Оршы не было нічога чуваць, і тут яна вылучае 5 кандыдатаў. Прычым, усе гэтыя кандыдаты працуюць у сферы культуры: адна інспектар па кадрах школы мастацтваў №2, яшчэ адна начальнік гаспадарчай групы аддзела культуры і ідэалогіі і тры чалавекі — супрацоўніцы цэнтралізаванай бугалтэрыі ідэолагаў. Атрымліваецца, што адной партыі ўдалося ўсталяваць кантроль над цэлым аддзелам выканкаму — беспартыйных кандыдатаў, якія працуюць у аддзеле культуры і ідэалогіі сярод кандыдатаў няма.