Як мы традыцыйна рабілі ўжо некалькі папярэдніх гадоў, новы, 2024 год рэдакцыя Orsha.eu пачынае з падвядзення вынікаў мінулага году. Будзем, вядома ж, па парадку. Наперадзе — студзень.

Адліга спрычынілася да таго, што вада цалкам затапіла аўтамабільны мост цераз раку Ардышоўка на Лёзненшчыне.

Два маладзёны-зачэперы пракаціліся ад Менску да Воршы паміж вагонамі. Іх затрымалі і аштрафавалі.

Скончыўся суд па справе прафсаюза РЭП, аршанец Васіль Бераснеў, вядомы праваабаронца атрымаў 9 гадоў турмы. Міжнародныя арганізацыі назвалі прысуд «палітычна матываваным».

А вось у Барані прагучаў прысуд у бытавой справе. За бытавое забойства мужа ў Барані жанчыну асудзілі на 18 гадоў.

Надзіва цёплае зімовае надвор’е запусціла паводку, якую ў гэты сезон ніхто не чакаў, свае берагі пакідаў і Дняпро.

Аляксандр Мухін апублікаваў унікальныя ўспраміны пра тое, на чым ігралі ў Барані, спасылкі на ўсе часткі мы дадалі ўнізе першага артыкулу.

Ад раніцы 22 студзеня па шмат якіх тэлеграм-каналах Беларусі прайшло відэа, знятае ў Оршы на вуліцы Леніна, з пераробленым мотаблокам-гібрыдам. Яно шмат каго насмяшыла, але кіроўцу затрымалі.

У Воршы не адбыўся хакейны матч праз адключэнне святла. Энергетыкі абвінавацілі ў яго зрыве супрацоўнікаў Лядовай арэны.

У Менску паставілі оперу «Ладдзя роспачы» па творы Караткевіча, музыку да якой напісаў нарадзінец Болбасава Сяргей Бельцюкоў.