Выбітны фізік сучаснасці Барыс Пятровіч Захарченя нарадзіўся ў Оршы 1 мая 1928 года. Маці хрысціла яго ў Аршанскай Свята-Петрапаўлаўскай царкве ўпотай ад мужа-атэіста, чырвонага камандзіра.
Сям'я вайскоўца-сапёра часта пераязджала ў іншыя месцы дыслакацыі, ў 1934 годзе пасялілася ў Ленінградзе. Пасля заканчэння сярэдняй школы Барыс паспяхова вучыўся на фізічным факультэце Ленінградскага універсітэта.
У 1952 годзе ён быў прыняты на працу ў Фізіка-тэхнічны інстытут АН СССР (пазней Інстытут ім. А. Ф. Іофе), дзе прайшоў шлях ад лабаранта да дырэктара аддзялення фізікі цвёрдага цела. У 1966 годзе абараніў доктарскую дысертацыю. У тым жа годзе яму і групе суаўтараў была прысуджана Ленінская прэмія за даследаванні новай квазічасціцы - Эксітона у паўправадніках, якая абумоўлівае многія фізічныя працэсы ў гэтым класе крышталяў, вызначыўшы прагрэс электронікі ХХ стагоддзя. З пачатку 1970-х гадоў Б. П. Захарченя праводзіць даследаванні аптычнай арыентацыі электронаў і ядраў у паўправадніках. У 1976 годзе стаў лаўрэатам Дзяржаўнай прэміі СССР.
Адначасова з навуковымі даследаваннямі Барыс Пятровіч паспяхова займаўся выкладчыцкай дзейнасцю. У 1973 годзе стаў прафесарам кафедры оптаэлектронікі Ленінградскага (цяпер Санкт-Пецярбургскага) электратэхнічнага універсітэта, чытаў лекцыі ў замежных універсітэтах. З 1988 года быў галоўным рэдактарам акадэмічнага часопіса «Фізіка цвёрдага цела».
За выдатныя навуковыя дасягненні, стварэнне ўласнай навуковай школы Барыс Пятровіч ў 1992 годзе абіраецца правадзейным членам Расійскай Акадэміі навук. Ён - кавалер некалькіх савецкіх і расійскіх ордэнаў, быў узнагароджаны прэстыжным залатым медалём імя П. Н. Лебедзева РАН.
Акрамя навукі Барыс Пятровіч плённа займаўся літаратурнай творчасцю. Яго пяру належаць бліскучыя артыкулы і эсэ, прысвечаныя сябрам - навукоўцам, паэтам, мастакам
У пачатку 2000-х гадоў вучоны меў намер наведаць наш горад і перадаць у музей старое пасведчанне аб нараджэнні ў Оршы (у ім яна яшчэ названая Воршай), грамату бацькі 1928 на беларускай мове ў гонар 10-годдзя абвяшчэння РККА, а таксама свае граматы і партрэты, у тым ліку з нобелеўскім лаўрэатам Жарэсам Алфёравым (таксама выхадцам з Віцебшчыны), сваім даўнім сябрам і калегам. На вялікі жаль, гэтыя рарытэты ў Оршу не патрапілі.
У 2005 годзе Барыса Пятровіча Захарчени не стала ...
Імем знакамітага вучонага названа малая планета, адкрытая ў Крымскай астрафізічнай абсерваторыі ў 1975 годзе. Яе нумар 5453. Яна мае дыяметр 6 км, знаходзіцца на мінімальным адлегласці ад Сонца 285 млн км, ад Зямлі -. 137 млн км