Манаскі ордэн трынітарыяў - даволі рэдкі ордэн не толькі для Беларусі, але і для ўсяго свету. А ў Оршы быў манастыр гэтага ордэну. Ад яго захаваліся толькі ўспаміны і будынак у якім сёння знаходзіцца архіў і ЗАГС - гэта і быў будынак манастыра. А побач з будынкам манастыра знаходзіўся і касцёл Уваскрасення Хрыстова. Пасля чарговага паўстання супраць Расейскай імперыі, трынітарскі манастыр з касёлам былі зачыненыя і перададзеныя праваслаўным. Пасля рэвалюцыі культавага будынка пазбавіліся і праваслаўныя, а касцёл быў перададзены ДАСААФ для заняткаў парашутным спортам. З таго што засталося ад купала храма скокалі з парашута. Ужо з таго часу засталося вельмі мала фотаздымкаў і мы не ведаем як дакладна выглядаў касцёл. У розных калекцыях можна было знайсці фотаздымкі скачкоз фотаздымкаў дзе былі бачныя рэшткі купала, асобныя парэшткі унутраных інтэр'ераў.

У калекцыі Нямецка-расейскага музея - фотаздымкі гэтай калекцыі мы цяпер па трохі публікуем на нашым сайце - знойдзены фотаздымак культавага будынка, які некалькі краязнаўцаў вызначылі як менавіта касцёл трынітарыяў. Калі гэта так, то гэта, здаецца, першы фотаздымак гэтага касцёлу з фасаду. Толькі фасад ужо крыху карэктаваны. Так, уверсе на фасадзе выкладзены надпіс "1935". Напэўна гэта год калі будынак пераабсталявалі пад патрэбы парашутыстаў. Камуністы такое рабілі, калі са зменай функцыі кульатавага будынку ў яго на фасадзе выкладалі менавіта гэты год. Можна ўзгадаць дамініканскі манастыр у Смалянах дзе выкладзеная дата стварэння трактарнай станцыі ў гэтым будынку. Перад касцёлам стаіць скульптура з адбітай галавой, магчыма, што гэта Ленін ці нехта яшчэ з камуністычных дзячаў. Затое будынак манастыра справа бачны па сценах - па ім і можна апазнаць, што за касцёл сфатаграфаваны. Бачна, што ў 1941 годзе манастыр быў пашкоджаны пажарам і застаўся без даху. Але ж самі сцены захаваліся і пасля вайны. А перад Дажынкамі былі адрэстаўраваныя ў сёняшнім выглядзе, хаця фрэскі, якія былі выяўленыя пад час рэстаўрацыі былі замазаныя.