Адзін з такіх канфліктаў у сярэдзіне месяца ацаніў суд Талачынскага раёна. Аршанец зайшоў у адну сеткавую краму Коханава, каб набыць піва. У прынцыпе, пачыналася ўсё дастаткова прыстойна, калі не лічыць, што піва наш зямляк захацеў у першай палове дня і быў ужо крыху на падпітку, але бывае...

Прадавачка прынесла яму піва, мужчына разлічыўся і толькі тады "запатрабаваў" (так запісана ў пастанове суда) падаць яму і закуску! Мужчыне прынеслі чыпсы. Магчыма, што такое абслугоўванне, амаль як у рэстаране натхніла будучага затрыманага на тое, каб тут жа ў краме і пачаць свой алка-перакус. Проста не адыходзячы далёка ад кассы аршанец адкаркаваў і піва, і закуску. Заўвагі прадавачкі ён ігнараваў.

Можа і не дайшла б справа да канфлікту і выкліку міліцыі, але мужчыну ўсё падабалася ў імправізаванай рэстарацыі, і ён вырашыў працягнуць, ды "запатрабаваў" яшчэ піва!

Тут ужо жанчына не вытрымала - яна ж не афіцыянтка! Жанчына адмовілася падаваць піва, спасылаючыся на тое, што той ужо парадкам п'яны і парушае парадак. Традыцыйна ў канфліктах: хто больш выпіў, той і лепш канфліктуе. Мужчына пачаў буяніць. Спачатку, патрабуючы "дагону", ён пачаў грукатаць па касе і ўвогуле сварыцца. А калі і гэта не падзейнічала, то ў прынцыповую прадавачку ён запусціў уласным мабільнікам!