У абодвух выпадках людзі сыходзілі ў лес на "ціхае паляванне". У суботу ў Сененскім раёне каля вёскі Калантаева заблукаў мужчына 1958 года нараджэння. Бліжэй да вечара пра тое што мужчына не вярнуўся своечасова да хаты ратавальнікам паведаміў яго сябра. Але, на шчасце, амаль праз гадзіну пасля паведамлення, грыбнік змог самастойна выбрацца з лесу.
Пра другі выпадак у Аршанскі аддзел МНС паведамілі калегі з Сененскага аддзелу. Раніцай кампанія з пяці чалавек пайшла ў лес за грыбамі каля вёскі Аланцьева. У абед кампанія зразумела, што самастойна з лесу яны не выйдуць. Аршанскія ратавальнікі прыгналі да лесу службовую машыну, каб падаваць грыбнікам гукавы сігнал. А 16-25 кампанія выйшла на гук пажарнай сірэны.
У абодвух выпадках заблукаўшым не спатрэбілася медычная дапамога, але не заўсёды такія здарэнні скончваюцца аптымістычна. У гэтым сезоне ўжо былі выпадкі калі грыбнікам даводзілася начаваць у лесе ў халодныя ночы. А ў нядзелю ў Шаркаўшчынскім раёне знайшлі труп грыбніка, які сыйшоў у лес у пятніцу.
