Адна з іх, 29-гадовая жыхарка Оршы, размясціла ў інтэрнэце аб'яву пра продаж ботаў. Неўзабаве адгукнуўся «пакупнік». Ён выказаў жаданне набыць абутак і прапанаваў аформіць дастаўку. Дзяўчына пагадзілася, даслала свой адрас і атрымала гіперспасылку для ўводу дадзеных банкаўскай карткі – нібыта для пераводу грошай за пакупку. Не задумваючыся пра магчымыя наступствы, аршанка пазначыла і нумар карткі, і тэрмін дзеяння, і CVV-код. І толькі калі з карткі зніклі 3000 рублёў, жанчына зразумела, што звязалася з махлярамі.

Яе 51-гадовая «сяброўка па няшчасці» падобным чынам прадавала тэлевізар. Махляры выкарысталі тую самую схему, і ў выніку з карткі жанчыны зніклі больш за 1300 рублёў. У абодвух выпадках злачынцы выкарысталі «падстаўны» сайт транспартнай кампаніі, якая нібыта ажыццяўляе дастаўку тавараў. Сайт быў размешчаны на замежным хостынгу і не меў беларускага дамена. Але жанчыны не звярнулі на гэта ўвагі і сталі ахвярамі так званага фішынгу – калі махляры падманам выведваюць чужыя банкаўскія дадзеныя і прысвойваюць грошы.

Вінаватых у падобных злачынствах удаецца знайсці вельмі рэдка. Супрацоўнікі міліцыі перыядычна папярэджваюць даверлівых грамадзян пра тое, што не варта паведамляць дадзеныя банкаўскіх картак пабочным асобам.