Убачыўшы ў сацсетках аб'яву пра нібыта «выгаднае ўкладанне грашовых сродкаў», жыхар Оршы вырашыў скарыстацца шматабяцальнай «магчымасцю» лёгкага ўзбагачэння. Перайшоўшы па спасылцы, ён указаў свае кантакты, і неўзабаве з ім звязаўся «спецыяліст», пад кіраўніцтвам якога мужчына павінен быў зрабіць першыя крокі насустрач заможнаму жыццю.
Першапачатковыя ўкладанні павінны былі скласці значную суму, але гэта не збянтэжыла 36-гадовага аршанца. Ён узяў грошы ў доўг у знаёмых, аформіў два крэдыты і перавёў на ўказаны рахунак больш за 26 тысяч рублёў. Пасля гэтага аршанскага "інвестара" пачалі "разводзіць" далей. Ашуканцы пераканалі яго перавесці на выплату «пошлін» і «падаткаў» яшчэ больш за 10 тысяч рублёў. Нядобрае мужчына западозрыў толькі тады, калі аферысты пачалі запытваць у яго сродкі на далейшыя «неабходныя выплаты», а сума пераведзеных сродкаў сягнула за 40 тысяч рублёў.
Мужчына звярнуўся ў міліцыю, і яго здагадкі пацвердзіліся: ён стаў ахвярай зламыснікаў, якія дзейнічаюць ад імя вядомай інвесткампаніі. Па факце махлярства, учыненага ў буйным памеры, узбуджана крымінальная справа. Але вінаватых пакуль не знайшлі.
