У раскладзе суду Аршанскага раёну і горада Воршы на 9 студзеня 2025 году фігуруе імя Алега Уладзіміравіча Плаксіцкага. Мужчыну абвінавачваюць па ч. 1 арт. 343 КК РБ — «выраб і распаўсюд парнаграфічных матэрыялаў або прадметаў парнаграфічнага характару».
Інфармацыю пра суд заўважылі хрысціянскія дзеячы, паведамляе «Хрысціянская візія».
Ініцыялы абвінавачанага супадаюць са звесткамі настаяцеля і штатнага іерэя двух храмаў — Нараджэння прасвятой Божай Маці ў вёсцы Друцк Талачынскага раёну і арханёла Міхаіла ў Воршы.
На сайце віцебскай епархіі паведамленні пра іерэя выходзяць рэгулярна: яшчэ два тыдні таму ён праводзіў экскурсію ў храме для аршанскіх гімназістаў.
Іерэй Алег Плаксіцкі трапіў у скандальную гісторыю ў 2016 годзе, калі стала вядома, што ён разам з іншым віцебскім святаром Аляксандрам Кавалёвым удзельнічалі ў арганізацыі трэніровак падлеткаў з Віцебскай вобласці ў расейскіх неанацысцкіх лагерах.
На асабістай старонцы ў сацсетках у іерэя Алега Плаксіцкага шмат публікацый у падтрымку Расеі і расейскай агрэсіі супраць Украіны.
Дзе адбыліся меркаваныя злачынствы з парнаграфіяй, у прарасейскім лагеры ці недзе ў іншым месцы, інфармацыі пакуль няма.
