27 снежня мінулага года ў якасці старшыні суда Оршы і Аршанскага раёна быў прадстаўлены Дзмітрый Разумовіч, а яго намесніцай стала Алеся Дранькова. Зрэшты, знаёміць з падначаленымі іх было не трэба: новае кіраўніцтва да гэтага працавала ў тым жа судзе, толькі радавымі суддзямі.
Дзмітрый Разумовіч да пераходу на судовую працу быў следчым, у судзе Аршанскага раёна і г. Оршы на пасадзе суддзі працаваў з 2017 года. Падчас яго прадстаўлення калектыву суда старшыня Аршанскага райвыканкама Ігар Мароз пажадаў новаму кіраўніку «знайсці кропкі судачынення з афіцэрскім складам і трымаць правапарадак у горадзе на тым жа ўзроўні».
На падвышэнне пайшла і суддзя Аршанскага суда Алеся Дранькова. У гэтай якасці яна прапрацавала тут яшчэ даўжэй - з 2014 года, аднак ёй прапанавалі толькі пасаду намесніка старшыні. Таксама яе прызначылі адказнай за арганізацыю працы судовай калегіі па крымінальных справах.
Аршанцам добра вядома, што і Дзмітрый Разумовіч, і Алеся Дранькова ў апошнія гады неаднаразова выносілі палітычна матываваныя прысуды па крымінальных справах і рэпрэсіўныя рашэнні - па «палітычных» адміністрацыйных.
Што тычыцца Алесі Котавай, якая раней узначальвала суд Оршы і Аршанскага раёну, то яе перавялі на працу ў Віцебскі абласны суд – у якасці суддзі па грамадзянскіх справах. У Оршы яна адпрацавала амаль 15 гадоў: з красавіка 2008 года была прызначаная суддзёй, з верасня 2011 года працавала намеснікам старшыні, а з мая 2017 года – старшынёй суда Аршанскага раёна і г. Оршы. У 2014 годзе менавіта яна прыняла рашэнне аб тым, што гарадскія службы не абавязаныя заключаць дамовы з арганізатарамі пікетаў, без якіх правядзенне любых масавых мерапрыемстваў забараняецца райвыканкамам.
