Жыхар Воршы ў сваёй шафе вырошчваў каноплі. У рэшце рэшт, ён трапіў у поле зроку аператыўнікаў аршанскага наркакантролю. Да 38-гадовага аршанца пагрукаліся ў кватэру.
Па месцы жыхарства падазраванага міліцыянты знайшлі шафу, абсталяваную для вырошчвання канопляў у хатніх умовах. У мужчыны сканфіскавалі палімерную ёмістасць з грунтам і раслінай, угнаенне, асвятляльныя прыборы, а таксама прыстасаванне для курэння.
Па словах мужчыны, каноплі ён вырошчваў для асабістага спажывання. На адным з інтэрнэт-сайтаў ён набыў насенне расліны роду Cannabis, у краме купіў неабходнае абсталяванне і стаў культываваць пасадку.
Следчы камітэт у дачыненні мужчыны завёў крымінальную справу за незаконны пасеў і вырошчванне раслін, якія змяшчаюць наркатычныя сродкі, у мэтах атрымання наркотыкаў.
