Спачатку - трохі гісторыі. У перасоўных ФАПаў на Аршаншчыне яна досыць кароткая: першы перасоўны медычны комплекс у раёне пачаў працаваць у 2023 годзе. Яго з’яўленне - адметнасць рэфармавання медычнай сістэмы ў Беларусі, паводле якой былі зачынены стацыянарныя фельчарска-акушэрскія пункты ў вёсках.
Так, яны былі не ў кожнай вёсцы, але, што называецца, у “пешай даступнасці” для мясцовых жыхароў. У ФАПе можна было атрымаць медычную дапамогу практычна штодня. Але гэтыя медпункты спасцігнуў той самы лёс, што і іншыя установы - недахоп кадраў. Тады іх вырашылі зачыніць, а дапамогу лекараў дастаўляць на колах.
Перасоўны ФАП - гэта адмысловая машына, падзеленая на тры часткі. Першая частка - гэта месца, дзе пацыенты сядзяцб у чарзе, другая - дзе адбываецца вымярэнне ціску і тэмпературы, тут жа робяць кардыяграму і здаюць аналізы, каб потым адвезці ў лабараторыю. Трэцяя частка - кабінет гінекалагічнага агляду. У выпадку неабходнасці лекары перасоўнага ФАПа даюць накіраванне ў бальніцу, бо іх паслугі - гэта так званая “даўрачэбная дапамога”.
А цяпер, нарэшце, пра тое, наколькі гэтая дапамога даступная для вяскоўцаў. Разважаць пра гэта можна, пазнаёміўшыся з графікам працы перасоўнага ФАПа, які публікуе “Аршанская газета”. Ен складзены такім чынам, што візіты ўрачоў у аддаленыя вёскі адбываюцца ўсяго раз на месяц. Да прыкладу, сёлета ў сакавіку трапіць на медычную кансультацыю жыхары аграгардка Зубрэвічы змогуць на працягу 5-ці з паловай гадзін. Ім, можна сказаць, пашанцавала, тады як жыхарам вёсак Вярхоўе, Хадулы, Мезенава, Дзятлава, Барэйшава, Балотавічы - наадварот. У кожны з гэтых населеных пунктаў перасоўны ФАП завітае толькі на адну гадзіну. Лічыцца, што гэтага дастаткова для пенсіянераў з не самым моцным, мякка кажучы, здароўем.
