Гэты комплекс будынкаў месціцца ў вёсцы Зялёны Бор Коханаўскага сельсавета і займае плошчу 6017,3 кв.м. Праўда, будынкі старыя - у асноўным узведзеныя ў канцы 1950-х гадоў.

Прадпрыемства пачала працаваць у 1961годзе, у 1998-м атрымала новы статус - Адкрытае акцыянернае таварыства «Кохановский льнозавод». 21 снежня 2009 года яго “узбуйнілі” - далучылі стратны Талочынскі льнозавод. Але паспяховай супольная праца не была, хаця дзяржава ўкладала ў развіццё льнаводства шалёныя грошы - на паліва, на ўгнаенні, на тэхніку. Але выручкі ад рэалізацыі прадукцыі не хапала, каб разлічыцца за дзяржаўныя пазыкі. 99, 69% акцый прадпрыемства належалі дзяржаве, але наладзіць вытворчасць толкам не здолеў ні адзін дырэктар, якія мяняліся тут “як пальчаткі”.

У выніку Коханаўскі льнозавод паўтарыў сумны лёс іншых прадпрыемстваў галіны: у 2018 годзе было прынята рашэнне прызнаць яго банкрутам. На той момант завод мещ запазычанасць на суму 3 915 464 рублі, тады як уласна маёмасць прадпрыемства каштавала ў два разы меней - толькі 1 909 000 рублёў.

Ясна, што маёмасць былога акцыянернага таварыства спрабавалі прадаць і пераразмеркаваць. Часткова гэта ўдалося, бо прадпраемства паспела закупіць шмат новай сельскагаспадарчай тэхнікі. Яна разышлася найперш. Але дагэтуль незапатрабаванымі застаюцца памяшканні льнозавода, і Талачынскі райвыканкам ўжо некалькі гадоў запар спрабуе іх прадаць, хаця б за мінімальны кошт. Але адна з умоваў для пакупніка - каб памяшканні былі выкарыстаны ў прамысловых мэтах, а рэгіён атрымаў новыя працоўныя месцы.