Прапанову не проста зрабіць гарадскія крыніцы прывабнымі, але і ператварыць іх у турыстычны аб’ект, выказаў дэпутат палаты прадстаўнікоў Уладзімір Бабічаў. Ен прапануе выкарыстаць для гэтага не толькі дзяржаўныя сродкі, але і добраахвотную працу грамадскасці. Тады, маўляў, усе крыніцы ў Беларусі могуць стаць такімі ж папулярнымі, як ”Трафімава крыніца” на Шклоўшчыне, “Каплічка” у Сянно або крыніца Божай Маці ў Лёзна.
Магчыма, не ўсе гараджане ведаюць, што не толькі ў Аршанскім раёне, але і ў самой Оршы ёсць некалькі крыніц. Праўда, прыкметы дагледжанасці мае толькі адна з іх - “Мурашкіна крыніцы” каля комплекса “Кацюша”. Найхутчэй, і назва, вядомая мясцовым жыхарам, пайшла ад прозвішча чалавека, які яе даглядаў...
Яшчэ адна, безыменная і не настолькі вядомая крыніца ёсць на правым беразе Дняпра ў раёне 1-ай Заводскай вуліцы. Падыйсці да яе можна і з вуліцы Бялінскага. Вада выведзена ў трубу, яе якасць ніколі не даследавалася. Тым не менш, яна досыць папулярная ў рыбакоў, якія тут вудзяць рыбу.
Яшчэ менш вядомая крыніца знаходзіцца на Балканскай гары - так, у Оршы ёсць такі тапаграфічны аб’ект на левым беразе Дняпра. Арыенцір - вуліца 1-я Прыбярэжная.
Ці стануць гэтыя крыніцы аб’ектам прыкладання грамадскіх высілкаў, як гэта прапануе дэпутат Уладзімір Бабічаў, мы зможам даведацца ўжо неўзабаве. Бо наперадзе - красавіцкія “суботнікі”.
