У чацвер 6 сакавіка ў інтэрнэце праходзіў электронны кірмаш вакансій Сенненскага раёна для грамадзян, якія шукаюць працу. На яго адведзена было дзве гадзіны - з 10:00 да 12:00.
У анонсе гаварылася, што ахвотныя змогуць азнаёміцца з вакансіямі, прапанаванымі наймальнікамі, умовамі працы, а таксама задаць пытанні, атрымаць электронную кансультацыю.
Аднак на старонцы кірмашу ў раздзеле "Вакансіі" ў чацвер 6 сакавіка ў 11:25, то бок у разгар кірмашу, мы ўбачылі 0 вакансій і паведамленне: "Пошук не даў вынікаў. Вакансіі публікуюцца толькі падчас правядзення кірмашу".
Магчыма, кірмаш адмянілі, ці адбыўся нейкі тэхнічны збой. Шкада толькі, што пра гэта на сайце кірмашу няма ніякіх паведамленняў, а гэта было б важна для тых, хто сапраўды хоча знайсці працу ў Сенненскім раёне.
