Будынак інтэрната даволі стары - ён быў узведзены яшчэ ў 1961 годзе, і аго абслугоўваннем займаўся Аршанскі льнокамбінат. Але ў 2010 годзе інтэрнат перадалі на баланс КУП “Оршакамунгас”. На той момант усе яго будаўнічыя канструкцыі і інжынерныя сеткі знаходзіліся ў кепскім стане.

Тым не менш, грунтоўны рамонт не праводзіўся, і людзі яшчэ доўга жылі ў антысанітарных умовах. Толькі ў 2019 годзе было прынята рашэнне пра “касметычнае” абнаўленне: у будынку нарэшце адрамантавалі дзверы і пафарбавалі столь у месцах грамадскага карыстання, часткова замянілі трубы, краны, ўнітазы, а на некаторых паверхах і электрапліты.

Аднак ужо тады было зразумела, што частковых паляпшэнняў мала: паўстала пытанне пра капітальны рамонт. Яго распачалі ў 2019-м, але не скончылі і дагэтуль, хаця пытанне пра добраўпарадкаванне інтэрната знаходзіцца на асабістым кантролі ў старшыні райвыканкама Ігара Мароза.

Бясспрэчна, за гэтыя некалькі гадоў было зроблена нямала - змяніўся нават знешні выгляд будынка. Пафарбаваны фасад, заменены інжынерныя сеткі, закуплена новая сантэхніка. Капітальны рамонт, на які, паводле дакументаў, выдаткавана больш за 900 тысяч рублёў, планавалі завяршыць яшчэ ў снежні 2024 года, але ўсе працы яшчэ не скончаны. Абвешчаны чарговы тэрмін завяршэння - красавік 2025 года. Але, як той казаў, “лепей пачутае ды ўбачыць”.