Матэрыялы крымінальнай справы больш падобныя на пераказ баевіка. Што ж здарылася той чэрвеньскай ноччу на трасе Орша-Магілёў? Разам са сваімі сябрамі п'яны М. катаўся на аўтамабілі Volkswagen Passat. Трапіўся на вочы супрацоўнікам ДАІ. Старшы памочнік пракурора Дзмітрый Варапаеў сцвярджае, што менавіта няпэўны рух аўтамабіля здаўся тады міліцыянтам падазроным. Яны запатрабавалі ад кіроўцы спыніцца. Той ірвануў наўцёкі.

Далей усё як у фільмах: выццё сірэн патрульных аўтамабіляў, некалькі кіламетраў пераследу, стрэлы па колах, навіслы на дзверцах машыны міліцыянт, якога падчас руху, дадаўшы хуткасць, адшпурнуў п'яны гоншчык ... Потым М. збіў другога супрацоўніка ДАІ і спыніўся толькі тады , калі урэзаўся ў перашкоду. Заканамерная кропка была пастаўлена ўжо каля вёскі Клін Магілёўскай вобласці.

Падчас затрымання вадзіцеля, які парушыў 11 пунктаў Правілаў дарожнага руху, міліцыянты атрымалі траўмы: ранкі, сінякі, удары. Цялесныя пашкоджанні экспертыза кваліфікавала як лёгкія.

Суд ўлічыў і тую акалічнасць, што непрацуючы віноўнік начнога надзвычайнага здарэння ўжо 5 месяцаў правёў пад вартай, гатовы выплаціць пацярпелым па 5 мільёнаў рублёў у якасці кампенсацыі маральнай шкоды, здавальняюча характарызуецца па месцы жыхарства, а таксама мае на ўтрыманні малалетняе дзіцё.